هل التكاليف الباهضة للزواج هي سبب رئيسي لهجرة شباب كرمليس

[gambit]

هلو شلونكم

عندي موضوع اتمنى من الكل ان يبدي رايه به لان يمس كل عائلة من عوائل ابناء شعبنا
هل التكاليف الباهضة للزواج هي سبب رئيسي لهجرة شباب كرملش في محاولة منهم لكسب العيش
وتوفير مال للزواج خارج الوطن لاننا نلاحظ خصوصا في القرى المسيحية صعوبة ايجاد فرص
عمل وان وجدت فهي قليلة وليست بالمستوى المطلوب فما هو رايكم


تحياتي -كامبت

[Milan]

موضوع حلو خوني .....

بصراحة انا ما راح اكول هذا السبب هو السبب الرئيسي بس هو احد الاسباب.....
يعني اكو نقطتين بهاي المسألة ..
الاولى اكو عوائل تطلب مهور خيالية على بناتها وتفضل يكون الخطيب ميسور الحال .... يعني الفقير ما عنده نصيب يمهم ابد .... وحتى متوسط الحال مرات .

النقطة الثانية اللي هي متطلبات الحفلة ..... والذهب والجهاز..... يعني تكول الحماة لو هي البنت بنفسها مرات .....
ليش فلانه سوولها هيجي حفلة و وسوولها هلكد ذهب واشترولها هلكد جهاز وهلكد فساتين ........... الخ من المتطلبات التي ليس لها معنى ...
مع الاسف الزواج عندنا تقريبا بدء يفقد معناه الحقيقي ...
فالزواج هو رباط مقدس يربط شخصان بحب ابدي ... ليكون الاثنان جسدا واحدا .... ويقف الواحد مع الاخر في السراء والضراء ...
لكن الزواج حاليا هو (ليس بصورة عامة ) كم لديك من مال ماهي وضيفتك كم تستطيع ان تشتري للبنت من ذهب و............الخ من الطلبات .
الا تفكر البنت او عائلتها ماهو مصيرها مع شخص لا تحبه ..؟؟
اتفضل حياة بسيطة وبحب ... وبدون مشاكل
ام حياة كلها رفاهية وبدون حب .... والكثير من المشاكل ؟؟؟
بصراحة وكنظرة وجه شخصية انا اختار الاولى لكن لا استطيع ان افرض على احد ما اريده انا بل اعطي وجهة نظري هناك من تعجبه وهناك من لا تعجبه وبالاخير كل واحد حر بما يفكر ويرغب...

الزواج المكلف دفع الكثير من شبابنا للهجرة للخارج كي يكونه نفسه ليستطيع تلبية الماطلب المتزايدة من البنت واهلها في الزواج ...
ومنهم من لجأ الى البحث خارج كرملش عن شريكة الحياة وبالاخص من الجارة قرة قوش ..

بالاخير شكرا اخ كامبت على الموضوع الجميل وعاشت ايدك

[putroszebary]

اخي ان موضوعك حلو واريد ان احرف عنوانه شويه بدل هجرة الشباب نقول كثرة العوانس مع احترامي الكبير لهن **ان السبب الرئيسي هو غلاء المهر ومتطلباته يعني اقل زواجه تكلف حوالي 10 ملايين ما نقول اكثر والسبب هو البنت وامها حيث تريد كذا وكذا فيظطر الولد المسكين الى العدول والسفر للخارج ويأتي وبيده فردة (****) ويخطب البنت الصغيره والتي يكبرها بعشرين سنه ويعطوها اهلها فرحين لأنه في الخارج يعمل في ( وش كار ) وخطيه باعتقادهم انها وظيفه مرموقه وما يعرفون ان الأفندي يغسل السيارات ** وعندما تصل الخاتونه للخارج تصطدم بالواقع وتندم حيث لا يفيدها الندم لأنها تزوجت من هو بعمر والدها (( ابو منذر ))

[gambit]

شكرا لكم يا اخواني الاعزاء على ردودكم الجميلة والمفيدة

طبعا الكثير من العوائل وخصوصا الامهات يفكرون بعريس غني وبسيارة
اخر موديل حتى من غير ان يسالوا من اين لك هذا ؟
والكثير منهم يفكرون بشخص ( اي شخص كان ) المهم انه يعيش بالخارج
فلماذا وصلت بعض العوائل الى هذا المستوى ؟؟؟؟؟

[سميرة جرجيس هرمز]

اكيد الماده اصبحت هم الناس وليس الرجل الصالح والمكافح والمحب لابنتهم والدليل كثره البنات في كرمليس وقله الشباب اتمنى من اهل البنات ان يتسامحو مع الشاب بطلباتهم ويفكرو بسعاده بناتهم وليس تعاستهم

[arass]

رأي مع رأي العم بطرس الزيباري

[rund]

اولا شكرا لهالموضوع الحلو للنقاش
ثانيا احب اذكر انه سابقا يمكن كان السبب الرئيسي لهجرة شبابنا هو الزواج ورفض اهل الفتاة لكونه غير ميسورالحال واحب ان اعطي راءيي بانه من حق اهلها في بعض الاحيان لكونه الشاب الذي يفكر بالزواج ويتقدم للبنت كيف يستطيع ان يعيش عائلة وهو لايعمل وليس لديه لا شهادة ولامهنة!!!!

لكن في الوقت الحالي اصبحت الهجرة موضة يتباهى الشباب بها فيما بينهم وللتهرب من تحمل المسؤولية مع احتراماتي للبعض لكن نجد الشاب يفكر بالهجرة لكون الخارج وسيلة للتحرر والتباهي حيث كل هذه الامور تغري شبابنا ويتهربون من واقعهم تاركين اهلهم وتعليمهم لماذا!!!!

شكرا

[gambit]

المشاركة الأصلية كتبت بواسطة rund

اولا شكرا لهالموضوع الحلو للنقاش
ثانيا احب اذكر انه سابقا يمكن كان السبب الرئيسي لهجرة شبابنا هو الزواج ورفض اهل الفتاة لكونه غير ميسورالحال واحب ان اعطي راءيي بانه من حق اهلها في بعض الاحيان لكونه الشاب الذي يفكر بالزواج ويتقدم للبنت كيف يستطيع ان يعيش عائلة وهو لايعمل وليس لديه لا شهادة ولامهنة!!!!

لكن في الوقت الحالي اصبحت الهجرة موضة يتباهى الشباب بها فيما بينهم وللتهرب من تحمل المسؤولية مع احتراماتي للبعض لكن نجد الشاب يفكر بالهجرة لكون الخارج وسيلة للتحرر والتباهي حيث كل هذه الامور تغري شبابنا ويتهربون من واقعهم تاركين اهلهم وتعليمهم لماذا!!!!

شكرا

صدقوني ان امر الهجرة اصبح غاية لابد منها للشاب ليس للتباهي اول التكبر او التهرب
من الواقع فمثلا نحن لدينا شهادات من جامعات محترمة بالعراق ولم نجد اي تعيين بالدولة
اضافة الى انه المجتمع بدء يفرض ابن الخارج مهما كان ويفضلونه على اللي عايش بالعراق
لكون اللي يتخرج من العراق يريد له بسنوات حتى يستطيع ان يتقدم لبنت بسبب الوضع بالعراق

تحياتي لك وشكرا على الرد
كامبت -بغداد

[dj1]

رأي مع رأي العم بطرس الزيباري
الان بنات كرمليس احسن بنات بس اختيارهم العرسان كثير غلط لان اهم شي الخارج حتى لو ما كان خوش رجال وهسه موديل بكرمليس البنات ياخذون مطلقين بس اهم شي هو من الخارج

[klkamesh]

شكرا على الموضع الذي يشمل كل عائلة وكل فرد وكل شابة وشاب
اخي العزيز كامبت براى المتواضع اسباب هجرة الشباب وعزوفهم عن الزواج هيا .
1. تفكير اغلبية البنات بالسفر الى الخارج . حيث اي فتاة يتقدم لها اي شب ساكن هنا بالعراق تفضل عليه اي احد قادم من بلاد الغربه مهما كانت مواصفاته او عمره او او ...... الخ وهذه حقيقة ولو ان جميع الفتيات يقولن انهن لا يفكرن بالخارج بتاتا .

2.غلاء اسعار المهر والشبكة وووو ........ الخ . اخ من المسلسلات المدبلجة ماذا فعلت بنا نحن الشباب . حيث الحماة لا تقبل باقل من كذا مليون ( وهل بنتك سلعة تبيعينها ) الحفلة يجب ان تكون مثل حفلة لميس والفستان مثل فستان نور وووو ....... الخ . ارحمونا ايها الحموات يرحكم الله .

3. كرامة الشاب قد يذهب الشاب الواحد ويتقدم الى ما لا يقل عن عشرة فتيات ويقابل بالرفض او ابسط شي يقال ان الفتاة بعدها صغيرة مع العلم انها عبرة مرحلة البلوغ .

4. فقدان الامل لدى اكثر الشباب مما يضطر الى السفر للخارج املآ بالرجوع في احد الايام والتقدم لفتاة ويتم قبوله بسرعة الضوء دون اي تعقيدات واسئلة وحتى لو رجع وكان عمره اكثر من خمسين سنة

وشكرا هذا راي الخاص لا اعلم ان كان صحيح ام خاطى ولكنه راي

[ريتا]

يا جماعة ليش كل ضنكم انه البنية مو خوش بنت ودائما مو زينة احجيلكم عن تجربتي 3 خطبوني من برا ما رضيت بيهم لان ما اعرف اصلهم وفصلهم بس لو واحد اعرفه من الخارج ومقابيله ولد من داخل العراق لا اختار اللي بالخارج لان هناك الحياة ما تكلولي هنا ششفنا اني انولدت بالحرب الايرانية وعشت شبابي بالحصار وهسا دا نعاني من الارهاب والحكومة كلهم علي بابا شنو هالعيشة ملينا وجمالة يكلولي (( افتخر انا عراقي )) ششفنا غير بس الضيم من العراق- العالم وين وصلوا وين وصلنا احنا اني حبيت ولد وهو حبني وعشنا قصة حب 3 سنوات ما كدرنا ناخذ بعض لظروفه هنا لا شغل لا تعيين لا امان وتكاليف الزواج والذهب كلش غالية وخيالية يعني شنسوي مو من حقنا نكفر بهيجي وضع --- سامحوني جنت خشنة بالرد بس هاي حقيقة وشكرا لصاحب الموضوع برد قلبي وخلاني احجي اللي بقلبي

[N-R]

تكثر الاسباب والنتيجة واحدة

[ميمي البغدادية]

كلكم الم رايكم الخاص وردوكم هوايا حلوة بس اعارض الاخت ريتا احنا ولدنا بالعراق ونعتز بهذا الشي والعراق احسن من اي دولة بالعالم بس غير الظروف هي الجرتنا على هيجي اشياء بس للعلم ترا البنت الها حق تختار ولد الخارج لان مستقبله مضمون هنا محد يضمن المستقبل اما اذا اكو ولد كامل ومكمل من العراق اني افضله على اي ولد باي دولة من دول العالم بس اني الوم الاهل هم صوج كل المشاكل ولو ما الاهل ترا الحبيبين ما الهم غير بعضهم والحب يسوي اي شي على العموم مثل ما تبقى العملية الخيار الاخير والمأسوف عليه يم الدكتور تبقى الهجرة الخيار الوحيد لتحقيق المستقبل للولد او البنت وهذا رأي الخاص واتمنى من الاخت ريتا ان لا تزعل مني صدكيني ماكو مثل العراق وتثبتلك الايام وشكرا الكم

[JIBRAIL]

انا اقول التكاليف الباهضة للزواج ليست السبب الرئيسي للهجرة ولكنها قد تكون حجة للسفر والتحرر من القيود التي تكبل الشاب في بلد الدكتاتوريات الارهابية او لان قسم من البنات واهلهن يفضلن الشباب الذي يعيش في الخارج من اجل التباهي والقسم الاخر من اجل التحرر من التقاليد والعادات التي تحكم المجتمع وتمنع ثقافة التعري والتحلل والفساد الخلقي والي اخره . ان تكاليف الزواج متوفرة لدى الشاب يستطيع الزواج ويعمل له مصلحة ويعيش بها بكرامة ويسر بالملايين التي يصرفها بسفره على العصابات التي تتاجر بالبشر فيسافر مهربا من قبل هذه العصابات او يلقى القبض عليه او يعاني شتى المصائب والويلات لكي يصل الى مبتغاه في بلاد الغربة . انا اعتقد سوف ياتي يوم فيه يندم كل من هاجر وترك وطنه وباذن الله سوف تستقر الامور ويرجع العراق امنا مستقرا اكثر من السابق ويسترد عافيته لانه يملك من الخيرات اكثر من اي بلد اخر في العالم .

[لانا]

استاذ جبرائيل مع احترامي لشخصك الكريم مو كل انسان يكدر يتكفل بتكاليف الزواج اذا انت تشوفها سهلة على اي شاب يحصد ملايين ويتزوج بيها صعبة على غيرك يشوف الالاف لو عنده فلوس يتزوج ما عنده فلوس يفتح عائلة واذا فتح عائلة شنو مستقبل اطفاله هنا اذا هو وعفوا على الكلمة بالدفرات اتزوج وكون عائلة مشكلتنا هسا انه السفر الى الخارج صار موضة وحسد مو لتحسين الظرف المعيشي او لتحقيق المستقبل عن نفسي اشوف هوايا شباب ماعدهم مستقبل هنا اوكي خلي يسافرون يشوفون مستقبلهم ببلاد الغربة بس اتعجب اشوف واحد وحيد ابوه وامه ويسافر مع العلم والديه من اغنى العائلات ويكدر يعيش ملك بكرمليس بس لان شاف صديقه سافر لازم يسافر او والدته شافت ابن جرانهم سافر تموت الا تسافر حتى ما يعلون جيرانهم عليهم او شي لاخ وهو الاهم انه يحب بنية وهي تفرض عليه انه تقبل بيه بشرط يطلعها للخارج عبالها رايحة للجنة ما تعرف شكو هناك بس مجرد تفتتح نت وتشوف حفلات وبنات ولبس فري ونسة ما تعرف يشتغلون ليل ونهار وما يلحكون مصروف البيت ومن جهة اخرى اتفاهم بشعور بعض شباب القرية اعرف هوايا بنات يجولهم خطابة وما يقبلون بيهم دائما يدورون ورا شي كلش ممميز او رجال من الخارج بغض النظر ان كان متززوج هناك او لا او عمره 80 او 20 سنة خلاصة الموضوع دا نعيش حالة صعبة ويحتاج كل شبابنا وبناتنا الى توعية بهالخصوص لان دا يروح مستقبل كرمليس والمسيحية بالعراق الى الهاوية *** دور منو يوعي هالناس ويرشدهم ؟؟؟؟؟؟؟؟؟؟؟؟

[rund]

الموضوع صار حار اكثر للمناقشة وارجع اعلق على ردود الاخوة والاخوات
الاخ كامبت اذا شبابنا عدهم شهادات وماديلكون شغل يعني مااتصور من يلتجئون للخارج راح يشتغلون بشهادتهم !!! ومو كل البنات سوا تاكد انت من تروح للخارج وتقبل هالبنت بيك بمعنى انه تعرف مادتقبل بيك لشخصك وانما لمصلحةيعني انت دتتاكد على فشل الزواج من هسة...
الاخ dj1 اني وياك بهالشى اكو قسم من البنات يفضلون هسة هالشى
الاخ كلكامش الاسباب الذي ذكرتها صحيحة بس مانخلي هالشى عثرة بطريقنا تره اكو بنات يقبلون وديتزوجون ويرضون باشياء بسيطة

الاخت ريتا اني ويا الاخت لانا من جاوبتج لانه اذا جان اكو شاب وتحبيه ليش ماتزوجتوا وكافحتوا

شكرا

[كرمليسيه]

موضوع حلو عجبني وسجلت بس حتى ارد عليه عيني يا شباب انتوا الكل بالكل والقرار بيدكم ما اعتقد اكو ولد ما يكدر يسيطر على عقل وقلب البنية اذا تحبه البنية وتحترمه ويكدر يفرض رايها عليه اما عن تحب الخارج او صوج الاهل او الظرف المعاشي مو مبالغة بس اليحب يضحي ويسوي المستحيل وماكو شي يكدر يوكف كدام الحب او كدام حبيبين يموتون على بعض هاي نقطة اما مرات البنت اذا تريد تسافر مرات يكون حقها مثل اذا مرة حجت ويا ولد كدام الناس صارت مصيبة والف سالفة يطلعون عليها او اذا واحد حبها وهي ما حبته يروح ينتقم ويحجي على شرفها والمجتمع صغير ومقفل وتتسرب الاشاة والكذبة بسرعة وتصير على كل لسان والضحية منو تكون طبعا البنت ما راح يتقدم لخطبتها اي واحد لسمعتها ووهي ماعدها شي فتلجئ لخطيب الخارج لان هاي الاشاعات بعيدة عنه وتقبل بيه مجبورة بسبب ظروف المجتمع هنا غير هذا كله ماكو احلى واحسن من عريس الاعرفه اللي احبه واشوفه واعشار اطباعه مو اللي بالخارج ما اعرف متزوج لو لا وما اعرف عنه اي شي مجرد غوا اهلي بالدولارات وبالعيشة هناك ومثل ما تكول الاخت لانا والاخت رند اذا الحبيبين يحبون بعض يكافحون ويتحدون كل شي بشرط الولد يثق بالبنية وما ينجرف ورا سوالف اهل القرى اللي تدمر بيه شرف بنات بريئات واشكر الاخ كامبت على الطرح المميز للموضوع يسلموا الايادي اخي

[قصي المصلوب]

انا اتحدث عن خبرتي بالموضوع
لا التكاليف الباهضة سبب بالهجرة بل اسباب اخرى منها عدم وجود فرص عمل والحسد وضن البعض ان الهجرة هي الملاذ الامن من العراق
ان احب شاب شابة وصمدوا سنين لن تقوة امامهم اي صعوبات امامهم فلو احبت شابة شاب بصدق تكون راضية بابسط الامور
انا من تزوج عن تجربة حب لسنين ستة هي كانت ترضى بابسط شيء فقط ان نكون معا لكن ان كان لي المال لما لا اقوم بالواجب
لكن الشرط ان كان الحب موجود لا التكاليف ولا الاهل ولا الشيطان يستطيع ان يقف امام الحب والزواج الحقيقي المبني على الحب هو الجنة بعينها

[gambit]

عاشت ايديكم على هالاراء الحلوة والمختلفة بوجهات النظر
اتمنى من الكل ان ياخذ الموضوع بأهمية لان مستقبل الشاب بالعراق مجهول

شكرا لكم اخوكم كامبت

[sinan-0072]

يا اخوان الام تريد تامين مستقبل البنت واذا ماكسرت ظهر العريس ماكو تامين اني واحد من الناس مع العلم اني عايش بامريكا . من تزوجت قبل سنتين تكاليف العرس والشبكه وكلشي كلفني والله العالم ٩٠ الف دولار هذا مو حرام

[MORANO]

بصراحة الموضوع كلش حلو وانا اوافق الكل على ارائهم الخاصة والناس اطباع وكل شخص يمثل رايه يجوز عن تجربة مر بيها او سامعها . فمثلا انا حالي كحال اي شاب في كرملش تركت العراق لاسبابي مع العلم لم يكن الزواج من ضمنها لكن وصلت الى حالة من اليأس في كرملش ليس بسبب الضروف المادية . لكن بسبب الضروف المتدهورة التي نمر بها ولسنوات وكاننا نعيش في قفص لاوجود للحرية فيه . وبرايي ليس هناك شاب في هذا الوقت يريد الزواج ولا يستطيع تحمل التكاليف لان اي شاب في العراق يعمل لسنة او سنتين يستطيع ان يكون نفسه واكثر.وكذلك بالنسبة للبنات ليس الكل لكن هناك نسبة كبيرة منهم لا يرضين بالواقع وبالشباب العادي يريدون شباب مال السلسلات المدبلجة عمي احنة بالعراق بلد الجهاد ايما مهند ونور كافي احلام الي يجيكم لاترجعوه حتى ليطفر عالجيران ويتزوج هناك بعدين وانتو تتفرجون بيه وتحياتي للجميع...........

[فراس يونس الشابي]

موضوع شيق وشكد منحجي بي تفرعاته متخلص بس اكول كلمة وحدة اللة ايساعد شبابنا على وضعهم

[gambit]

الشاب الان بوضع صعب جدا من ناحية تكاليف الزواج ومن ناحية الامان المفقود وقلة فرص العمل بالعراق
فاذا شخص حصل اقامة او جنسية بالخارج ويامن على مستقبله هناك لانه بالعراق لو شخص مهما عمل ومهما
حصل مبلغ ما يأمن على روحه بالعراق ولا ااكو ضمان لمستقبله

[صقر العراق]

انا اضن ليست التكاليف الباهضة وانما المستقبل الفاشل الموجود بالعراق ليش منعيش الواقع ليش انكول لو كان العراق هيجي ماجنا انسافر اي نعرف هم جدي جان يكول نفس شي وهاي مئات السنين نفس الحجي والله طبعا الشاب الواعي ينظر الى المستقبل اذا تزوح ماذا سوف يكون مصير اولاده هل يربي لياتي ارهابي ويقتله او يتعب عليه ويدرسة بعدين يذب الشهادة العفوبالزبالة يا مستقبل ياعراق كلنا صرنا مثل الحكومة شعرات وبلا فائدة والله العراق اغنى بلد والله العراق اجمل بلد والله وشنو الفائدة اكثر البلدان تخلف ثلاث ارباع الشعب متخلف يمتى يطورون هذولة المتخلفين عمر العراق ما جان خير كلة حروب وقتل وجذب وشكرا

[gambit]

شكرا لكم جميعا على ردودكم الحلوة والمفيدة نتمنى كل التوفيق للشباب المغتربين انشاء الله